An Amazon

[Karesk]

War’n pri Predennek, war dhor a Dhewnans, war’n gweres a Gernow, glaw a goedhas. Omdhegys anodho veu tri fleghes yn brysyow an breow: dew vab Dewnans, Tavi ha Torrek; ha myrgh Kernow, henwys Tamara.

Ha hi fleghik hwath, y fedha Tamara ow resek yn hwyls a-dro dhe’n rosyow, dres an karregi, a-dreus an treth, hag yn mordardh heb own vyth. Pan wrynyas Tavi ha Torrek gans aga heniterow Gernewek, Tamara a vedha orth aga thewlel dhe’n dor kepar ha ysennow felghys. Raghenna, tus a’s gelwis “An Amazon”.

Tekter an voren a devis dres an blydhynyow ha hwans rygdhi a devis yn kolonnow an wesyon Dhewnansek. Hy thanta y a wrug aga dew. Sewena a wrug dos dhe Davi, ha skonyans dhe Dorrek. Tamara ha Tavi a vedha ow kwari warbarth dres nansow an order, mes Torrek a wrug fia dhe’n Mor Havren yn dan anken.

Ena y teuth an estrenyon yn ynys ma. Omsettya orth Pow Dewnans a wrussons y, ha tewlel Tavi ha Torrek dhe’n dor kepar ha ysennow felghys.

Omsettya orth Kernow a wrussons y ena, mes Tamara a sevis er aga fynn. May hylli hi gwitha oll an or hir, omdastreylya hi a wrug dhe’n keth dowr hag a dheuth hi anodho wostalleth; ha keffrys y hwrug an wesyon Dhewnansek.

Bys yn agan dydhyow ni, yma Tamara An Amazon ow kwitha oll an or hir a Gernow. Yma hy harer Tavi a’y wrowedh rybdhi hag orth hy entra hwath a-woeles. Hag yma Torrek ow fia hwath anedha dhe’n gledhbarth.